للتوسع الكبير فى نشاط شركتنا تطلب الشركه لفرعها بدبى مجموعه من حديثى التخرج لإنضمام لفريق العمل وذلك فى التخصصات التاليه 1- خريجى جميع الكليات أقسام ( مجموعى الى جبنى الكليه ده ) 2 - خريجى كليات الشعب قسم ( هتلاقى منى كتير فى البلد ) 3 - خريجى كلية الخدمه الإجتماعيه قسم ( هو فيه ايه ) وتعلن الشركه أنها توفر سكن فخم وعربيه (عمرك ماحلمت تركبها ) وعيشه أدميه للموظفين وكذلك تعد جميع موظفيها أنهم سيكونو قادرين على الزواج خلال 3 سنوات على الأكثر نتيجة المرتبات العاليه . هناك سؤال يدور فى بال كل طالب من الأن وقبل التخرج .... ياترى هو انا لما اتخرج هشتغل فى ايه... وهاخد كام .. طيب بالمرتب ده انا هتجوز ازاى وامتى .. وياترى هشتغل بشهادتى ولا اجهزلها مكان على الحيطه من دلوقتى . وطبعا لما كل واحد مننا يفكر ويلاقى الدنيا صعبه قوى فى مصر على طول يلجأ ويفكر فى السف خارج البلاد ويدور على الإعلانات ويبعت لشركات التوظيف ودفع دم قلبه على شان يسافر . وبكده يبقى نجح اصحاب المصالح فى تطفيش خيرة وزهرة شباب مصر على شان يشقو ويتعبوا ويزرعو ويعمرو بره ويسيبو مصر .. مصر الخير والأمل .. مصر الفجر والنور .. مصر الطيبه والحن الدافى ... مصر اللمه والصحبه الحلوه .. مصر الى كانت الدول بتجيلها على شان تتعلم منها ومن حضارتها .. مصر مهد الأديان والحضارات ... نسيبها ليه وعلى شان ايه ؟؟؟ انا شايف دمعتها وولادها بيفارقوها وهى بتصرخ وتقول .. بقى كده يبنى اكبرك واعلمك واشربك من نيلى ولما اقولك محتجالك تسيبنى.. ليه ياحببى تسيبنى لولادى المفسدين يفسدو فى أرضى ويسقوا خيرى ويقمعوا ولادى المصلحين الى زيك .. ليه تسيبهم يلوثونى ويدبحونى وانته بتتفرج .. وياريتك بتتفرج لأ دنتا سايبنى كمان على شان يستفردو بيه ومايلاقوش الى يقف لهم وينهشو لحمى وينهبو خيرى .. بقى هو ده رد الجميل . وزى منا شايف الدمعه فى عينيها شايف لومك عليها وانته بتقولها يا مصر يا أمى أنا ماشفتش على أرضك الا الذل والبهدله وقلت القيمه ... انت خيرك بقى لناس معينه عايشين عليك وبيتمتعوا بخيرك وهواكى ونيلك ... انت بتقولى انك كبرتينى وشربتينى من نيلك شربتينى صحيح بس شربتينى ميه كلها أمراض وتلوث وماخفتيش عليه ... علمتينى تمام بس علمتينى أحفظ ومفهمش وف الأمتحان أرجع كل الى حفظته على ورقة الإجابه ... علمتينى امشى جمب الحيط علمتينى علم بتاع كتب مش بتاع حياه وعمل ... علمتينى أطاطى على شان أعيش ... وزى ماعلمتينى علمتى ولادك التانيين .. مش برضو همو ولادك ؟؟؟ علمتيهم يدوسوا على الى مالوش ظهر .. علمتيهم ان خيرى ليك لوحدك اما الباقى فهم خدم وحشم ليك ... علمتى أخويا الظابط انه يلطش فيه وينهب خيرى وياخد قوتى ويدخل بيتى وياخدنى من الشوارع من غير أحم ولا دستور ... علمتى أخويا الريس والوزير والمحسوب والمنسوب أن مصر ليه وللى زيه ... أما انا ولا زى فماليش حقوق والمفروض انى احمد ربى على انهم سيبنى اعيش حتى ولاو تحت الأرض ..... جاوبينى مش أنا ابنك زى مادول ولادك ... وبعد كل ده عاوزينى اعد على ارضك طيب ليه !! وعلى شان ايه !! وبعد اللوم الى أنا شفته شايف مصر بتضرب كف على كف ... برافو ولادى برافو عليكو نجحتوا بجد برافو عليكو .. نجحتوا تكرهوا ولادى فيا .. نجحتوا تنزعو انتمائهم لأرضى .. نجحتوا تزرعوا اليأس فى ولادى الصالحين ... يابنى قلى هو انا برضو لوثت الميه ؟؟ هو انا بقى الى بوظت تعليمكوا ؟؟ ولا انا برضو كنت السلبى الى يشوف الغلط قدامه ويسكت ومابيتكلمش ؟؟ وهو مش انا الى كنت قبلة الشرق ؟؟ ومش انا برضو كانت كل العالم بتتعلم منى ؟؟ ومش انا كمان الى فتحت حضنها لكل اخواتها العرب ؟؟؟ تحب اجاوب والى تروح تلحق تلم الشنطه وتعد العده لسفرك ؟؟ بس انا برضوا هجوبك يبنى انا أرض كل خير بس خيرى محتاجلو رجال يقفو يدافعو ويبذلو كل الى بيملكوه على شان يظهروه . والحرام هيفضل ينهب ويسرق فيه طول مالناس واقفه بتتفرج عليه ومابتتكلمش ... وهفضل كده مسروقه ومنهوبه وانتو عايشين فى ظلم وفقر وقحط طول مانتوا بتتفرجوا... وكمان بدل ماتحط ايدك فى ايد اخواتك المصلحين فضلت انك تهرب ودور على نفسك انته وبس. طيب انا هسألك لما تسافر هتعد أد ايه ؟؟ وياترى هترجع ولا هتفضل فى الغربه طول عمرك ؟ ولما ترجع هتعمل ايه ؟ حتى ولو معاك ملايين ازاى هتعيش فى وانا ارضى اتملت فساد ؟؟ أخيرا هقولك كلمه (( لايحك جلدك الا ظفرك )) ((بحبك يامصر وهفضل انادى بحبك بحبك ))